اليتيمة

مرت عباب العيد طفلة صغيرة
لا خاطية ولا فرخو عناقيدها
حافية وفستانها الخمري اهترا
وشعرها مدردر حويلا جيدها
تحت الشتي والبرد صارت ناطرة
تشقع ضباب وغيم من تنهيدها
قالت انا طفلة يتيمة معثرة
طلبت الحسنة ومدت ايدها
ضربو حواليها حراسة مشددة
وقسيو عطفلة بعدها مثل الندي
الاول كمشها بشعرها وكز النياب
مثل ذيب وشاف قدامو جدي
الثاني صفقها كف
نزلت عالتراب
صفرا مثل ورقة خريف مجعودة
الثالث عليها اتداخل برد الجواب
الرابع دفشها بكتفها وقلها ابعدي
يا بنت حاجي تعكري جو الشباب
روحي ابرمي بغير مطرح واشحذي
ركضت هريبة لتحت في الياسمين
وتركت صحاب العيد عم يتناغشو
صدفة انا قاطع بمفرق عاليمين
مدروش وماشي خلف ناس اتدروشو
سمعت صرخة غامقة وموجة عنين
وصابيع بين الزهر عم يخربشو
اسألتها يا بنت انتي بنت مين
وخدودك بأي صابيع تخربشو
قالت اسمعني كان في عندك يقين
لخبرك كيف المصايب بلشو
بيي انقتل تعذيب عند المجرمين
وسكرو على دماتو بعد ما حششوا
عبيتنا فاتو جماعة مسلحين
بواريهن بوجه امي اتخرطشو
حزو عرقبتها سياخ مسممين
ومن بعد ما خلعوا الخزانة وفتشو
ليكملو على سوارتين مذهبين
زنودها على الميلتين اتقطشو
نحنا بلا ام وبي صرنا مشردين
بدموعنا الايام عم يتطرطشو
عندي تلات خيات مثلي قاصرين
خيي وحيد جوانحو ما ريشو
تركتو الماما ابن اربع سنين
ومن يومها عم دق عبواب البشر
لعيش من خبز الشحاذة ةعيشو
يا معمرين العيد يا بيوت الكبار
حاجي بقا كفر وخلاعة وزنطرة
يا حاملين قلوب اقسى من الحجار
وعيون مطفية وعقول محجرة
دا بدال ما تزيدو البلد فقر ودمار
خلو العفو موجود عند المقدرة
عم تدفعوا ملايين علعب القمار
وبترهنو اتنعشر بناية معمرة
وبتلحقوا بنات الهوى ليل ونهار
لتشتروا الغمزة بخزنة مجوهرة
والبنت اليتيمة اللي ما لها اهل وديار
بتطعموها قتل لتشبع وجع
وبتبخلوا عليها بحسنة صغيرة


ارجو ان تنال اعجابكم

اترككم مع الاستماع والتحميل من هنا

سلمت يداك أخي إيهاب
موال جميل جدا و مؤثر لا أستطيع التعقيب عليه

دمت بسلام

صدقت اخي بشار ما منقدر نرد على موال روعة هيك شكرا اخي ايهاب